Alptraum eines Vegetariers
Mia schmeckt koa Schnitzl, mia schmeckt koa Faschiats,
Ah ned ka Hendl, egal, is a brohdens oda paniats.
Owa am allerschlimmstn, wos i jo iwahaupt ned kapia,
Dass i fia an Lebakas, scho rein goa nix faschbia.
Do ku da Lebakas egal wia guad ah no sein,
Auf a Gordn Blöh , mit an Schinkn no drein.
I sogad drauf nua, bitte seihds ma ned behs,
I hätt gern a Butterbrot mit Schnittlauch und Käs.
Glanz und Duft ana Schdöhzn fablossn,
Gegn an greanan Salohd mit Sojaschbrossn.
A Fettaungsuppm, gmocht aus Rindaleichn,
Wiad ana Kürbiscrem niemois-nia is Wossa reichn.
A Eintopf aus Gurkn, Paradeisa und Karottn,
Schdöhd jedes Bauchfleisch in den Schattn.
Und während i mi so gaunz im Greazeig falia,
Auf amoi wos feichts auf meina Wangan gschbia.
Es is unsa Kotz, di si putzt und mei Gsicht dabei schleckt,
Sie hod mi aus mein vegatirschen Oibtraum gweckt.
Dem Herrgott sei Daunk, i hob ollas nua drahmd,
Ka Schdickl fo oi dem guadn Fleisch ned fasamd.
I weas fia mei Lehm wahrscheinlich niemois fagessn,
Und fuam Schlofmgeh ned no amoi wos Schwares essn!
